Eleni byddwn yn cynnal taith gerdded Brasgamu er cof am Olwen Blaen Coed. Roedd Olwen wrth ei bodd yn cerdded ac yn un o'r Brasgamwyr brwd a oedd yn llwyddo i fod yn un o'r rhai cyntaf i orffen y daith bob tro! Hoffem gynnal y daith hon i gofio amdani ac i ddiolch am gael nabod person mor annwyl a hoffus.

Taith 10 milltir o amgylch Llyn Brenig fydd hi leni (ia, dipyn haws na 26 milltir!!) a bydd cyfle i rai ymuno hefo ni hanner ffordd o amgylch y llyn petai 10 milltir yn ormod. Mae'r llwybr o amgylch Llyn Brenig yn addas ar gyfer pramiau. Caiff y plantos bach feicio os y dymunent ond gofynnwn yn garedig i rieni ofalu amdanynt a sicrhau nad ydynt yn mynd ar eu pennau eu hunain.

Ni fydd angen cofrestru ymlaen llaw ond gofynnwn yn garedig i chi gyrraedd maes parcio Canolfan Ymwelwyr Llyn Brenig erbyn 12.30 fel y gallwn gychwyn y daith yn brydlon am 13.00. Gofynnwn am gyfraniad o £15 yr un neu £25 y teulu a bydd yr arian a godwn yn mynd tuag at Uned Gofal Dwys Ysbyty Glan Clwyd, Ambiwlans Awyr Cymru ac Ymatebwyr Cyntaf Uwchaled. Os hoffech ymuno â ni ar hyd y 4 milltir olaf, bydd modd i chi gychwyn yn y maes parcio sydd ar yr ochr arall i'r Llyn oddi ar ffordd Nantglyn am 14.30. Gallwch dalu eich cyfraniad ymlaen llaw ar JustGiving ac os nad ydych yn gallu ymuno â ni ar y daith gerdded ond eich bod yn dymuno rhoi cyfraniad gallwch wneud hynny yma hefyd.

Felly ymunwch â ni i gofio am Olwen a chodi arian at elusennau lleol pwysig.